Saturday, November 10, 2007

VANNEI ZO LANNU

(He thuhlaril hi Kolkota a ka thiannu, Mizoram house a thawk mek hnen atang a ka dawn a ni a. Pi Laldawngliani chawngthu phuah a ni)

VANNEI ZO LANNU:

Mami, ti suh
Mami, ha suh
A mawilo
Mami, melh suh
Mami, sawi suh
A tha lo
I ti leh ta maw?

A dik alom,
Zilh zel rawh
Zilh hauhna duhawm a ni e
Hmangaihna aw ka
Tunge mamawhlo leh
Thatpui lo ngai
Fel sa reng a piang tu kan awm si lo

Kan zilh cham chi e
Mami hi
Inchhungah leh
Khawtlangah nen
Radio-ah te
TV-ah pawh
Weekly ah lam in

Hmeichhe tha leh fel awm dan
-Inchei dan mawi
-mi biangbiak dan
-rawngbawl tui dan
-inchhung enkawl dan
-fa te enkawl dan
-mo fel nih dan tur chen in

Zo lanu
I vannei ngei e
Heng zilhna zawngte hian
Rah tha an la nei mawlh ang
Nge ni an nei der tawh le?
I pasal tur an vang tiin
Khawtlang kan buai ta e law…

Hawh u khai
Mami pasal tur
Mama hi
Thlah thlam tawh lawng
Keizawng ka lainat e
I’m nobody’s child ang ziazang in
Zilhtu reng a nei ve lo

Fel hian luat a nei mawlh lo
Awm dan mawi te
I hrilh ve ang
Fa tha nih dan leh
Nupui fanau enkawl dan te pawh
In leh lo din a
Chhungkaw kaihhruai dan thlengin maw le


A mamawh hlei hlei Mama hian
Eng vang nge I ti a maw…
Hnam humhimtu a ni miau
A kokiah hnam future a in nghat e
Lanu hian amah chauhvin
Hnam a chawimawiin
A mualpho zo lo

Nakin
Hnam khaipa tur
Mama hi
I tuai hriam ang khai
Tunah hian
A thatloh chuan
Zoram tan hmabak a thim

Women’s interfaith Journey ah ka tel ve a!!

Oct ni 9-15 2007 khan, Hyderabad a Henry Martin’s institute a buatsaih, International seminar on Women’s interfaith journey neih a ni a. Centre for Women’s studies, University of Hyderabad aiawhin ka junior naga nula nen kan va tel ve a, beisei ai takin a lo nuam phian mai. He seminar hian a tum ber chu tunlai khawvel hmun hrang hrang a sakhua avanga buaina leh ram chhung buaina chungchang a hmeichhia ten harsatna an tawh te sutkian dan tur leh heng buaina chingfel tura remna leh muanna a awm theihnan, sakhaw hrang hrang betu hmeichhiaten in zawmkhawm in engtinge hma an lak ve ang? tih thupui hman a ni a,khawvel hmun hrang hrang Africa, England, Canada, Srilanka, Bangladesh, India ram aiawhin mithiam tak tak te paper buatsaih zirho a ni. Ram hrang hrang atanga kalkhawm kan nih avangin hmeichhiate harsatna tawrh a inang lo hlawm hle.


Sakhua a in ang lo a,khawtlang nun a inang lo bawk a, hmeichhe dinhmun leh an harsatna tawh te pawh a inang lo hlawm hle. Ram thenkhat ah chuan hmeichhiate sawisak an ni a, thenkhat pawngsual an ni bawk. Chutih lai chuan Srilanka ah te chuan hmeichhe thenkhat erawh suicide bombers an lo ni ve leh zel nen. Engtia hmalak tur nge ni ang le? Hmeichhia leh hmeichhe inkar pawh chinfel a ngai a ni tiin hnialna tam hle. ‘Engpawhnise remna leh muanna thlen tur hian hmeichhiaten kan ti ve thei a,sakhaw hrang ang a kal mai lovin kan tangkhawm thei a, thawkho turin kan inbuatsaih mek zel ang’ ni tih chu member kalkhawm te thuthlukna ber a ni.


Hemi ni hian rilru khawih em em mai chu, Manipuri nu Rose-i chuan he hun hi a tan chuan a mangangna leh harsatna a lo pairuk reng thin sawi chhuah nan rawn hmangin, an state a buaina avanga vawi tam tak pawngsual a lo nih toh avanga a rilru na reh theilo, chumai ni lovin a fanu ngei pawhin pawngsual a tawh thu tap chhuak hawm hawm chunga a rawn sawi khan member-te min vel tap nasa hle.

‘Domestic Violence Act 2005’ Thlirletna

Kum 2006 hi India ram a hmeichhia te tan chuan kum chhinchhiah tlak, Domestic Violence Act 2005, India ram parliament in a pass kum a ni a, state thenkhat a dowry (thuamchhawm rip) avanga harsatna tawk mek hmeichhiate tan phei chuan hei tluka thu lawmawm hi a awm awm lo ve. He dan hi Sawrkar laipuiin a pawmpui a ni tih puanchhuah a han nih chiah chu mi tam tak beng a verh hle mai. India ram hmeichhe pawl hruaitu te pawh an lawm hle a nih kha. Renuka Choudhury, Minister for Women and Child Development chuan ‘ India ram hmeichhiate tan diwali lawmnan a ka thilpek a ni’ a rawn tinghal a, Girija Vyas, Chairperson, National Commission for Women pawhin‘ Kan tan chuan he dan tluka thu lawmawm hi a awm thei lovang, Diwali leh Eid lawmnan a hmeichhiaten thilpek kan dawn hlu ber a ni’ a lo ti ve bawk a, New Delhi a Centre for Social Research Director, Ranjana Kumari pawhin ‘ he dan thar hian khawtlang kalphung diklo tak rei tak lo upbeh tawh chu a rawn phawrhchhuak a ni’ a ti bawk.


Domestic Violence Act 2005 hi 13th September 2005 khan India ram President chuan a lo pawmpui tawh a, 14th september 2005 khan Ministry of Law And Justice (Legislative Department) chuan vantlang hriat atan tlangzarh nghal a. Chumi hnu kum khat meuh a han vei hnu 26th? Oct 2006 ah Parliament ah pass a ni ta chauh a ni. DVA (a lam tawi nan hmang mai ila) hi, India ram danpui (Constitution)-in inchhungkhura tharum thawhna leh a kaihnawih thilte avanga harsatna tawk mek hmeichhiate dikna leh chanvo a humhalhna a ni. He dan hian a huamzau hle mai a, hmeichhia tupawh pasal nei tawh, nula, hmeithai leh pasal then a, in hranga cheng tawh, inchhungkhur harsatna tawkte dikna leh chanvo a rawn humhalsak a. Chumai ni lovin, nawhchizuarte chanvo a humhalhsak bawk. Hei hian heng nawhchizuar ho kawppui tur lo siamsak luihte leh an pawisa lakluh lo hlep thensak thinte a khap bawk. Tin hmeichhia a pasalin a pawngsual (marital rape) hi he dan hian a huam tel bawk. (Hei hi hmeichhia a duhloh chunga a pasalin mipat hmeichhiatna a hmanpui luih thin hi a ni).Tunah hian Criminal Law ah dan ang takin hmeichhia te an pasalten an pawngsual case hi la file thei rihloh mahse, DVA hian tunah hian kawngthar, an sahimna tur a pek mai bakah mipate an nupuite laka nunrawnna tur engemawchen a dangbet a ni. Heng bakah hian DVA hian naupang chunga mipat hmeichhiatna hmanga nunrawnna (Child Sexual Abuse) a rawn khap mai bakah a vawikhatna atan naupangten inchhungkhura kut an tawrh lohnan naupang tan dikna leh chanvothar a rawn siam sak bawk.


DVA hian hmeichhe laka nunrawnna hrang hrang, Physical Violence, Sexual Abuse, Verbal violence or Emotional violence leh Economic violence te a huam a. Physical violence hian taksa hliam khawpa insawisak, nunna atan pawha hlauhawm khawp, piansualna leh an hriselna tichhe vek khawp a hmeichhiate chunga hleilenna te a huam a. Sexual Abuse chuan mipat hmeichhiatna kawng hrang hrang hmanga hmeichhiate tih retheih leh an zahzawmna tih bawrhbansak etc te a huam thung. Tin, Verbal Violence leh Emotional Violence hian a huam chin chu tawngkam na tak hmanga rikrap leh an nunphung leh nungchang tichhe thei zawng a vau te, an hnathawk ve tur khap beh sak te, an hna atanga bang tur a nawrluih te, a hlawhchhuah lakluih sak etc te hi a ni. Heng bakah hian fa an hrin theihloh avang leh thuamchhawm tha an neihloh avanga hmuhsit an nih phei chuan nasa lehzuala an chanvo humhalhsak a ni bawk. Economic Violence ve thung ah chuan hmeichhia ei leh bar zawn kawnga sum an dap ve theihna tur dan beh sak te, inchhungkhur bungrua a ma mimal in a a neih leh chhungkua anga a lo neih te mipa in a ma duhthu a a lo tih rilral mai mai etc te a huam tel a ni. Heng ang harsatna hi hmeichhiain a pasal emaw a kawppui (innei chiah si lova a mipa kawp) emaw lak ah a tawk a nih chuan thubuai a theh lut thei a, mahse heng kan tarlanah hian mipa te chauh hi thilsual titu/nunrawnna thlentu an ni bik hauh lo. Hmeichhia te ngei pawh naupang, tar leh mo te chunga nunrawnna thlentu an ni ve thin tho avangin he dan hmang hian hrem theih tho a ni ve bawk.


Chak zawka dan hi kalpui leh hmalak a nih theihnan Magistrate kut ah thuneihna sang tak pek a ni a, a pui turin State Sorkarin Protection officers a (theih hram chuan hmeichhia) district tinah a dah tur a ni. Thubuai hi a rang lamin thenawm hnai emaw, social workers emaw an chhungten Protection officers te hnenah an thehlut tur a ni. He thubuai chinfel a nih hma hian hmeichhia chu a pasal in inchhung atangin a lo hnawtchhuak mai mai tur a ni lova, a pasal nena an chenna inah awm theihna a dil thei a, dan angin inchhung ro leh bungrua la nei lo mahse an chenna in hmun thenkhat lai chu a ma mimal mamawh dah nan a hmang thei bawk. Tin, Protection Officers te hian an mamawh tur damdawi leh eitur pethei turin an inring reng tur a ni. Tin, hmeichhia chu chenna tur mumal nei lo a nih chuan chenna tur hmun ‘Shelter Home’a a ngaihtuah sak bawk tur a ni.


Hmeichhiate humhalh kawngah hian India ram constitution hian dan thenkhat, Equal Remuneration Act, The prevention of Immoral Traffic, the Sati Prevention Act leh Dowry prohibition Act, 1961 te a lo siam tawh a. 1983 provision of Indian Penal Code 498A ah chuan ‘hmeichhia, a pasal emaw, a pasal a chhung tu te pawh in a chunga nunrawnna an lantir a nih chuan, chumi chu dan in a hrem tur a ni a, jail tan theihna kum thum chhung thleng emaw, leichhawitheihna emaw hmanga hrem theih a ni’tiin dan a lo siam daih tawh a, mahse inchhungkhur bika hmeichhiate harsatna tawh chinfelna dan mumal bik hi a la awm ngai hauh lo mai a. Hemi vang pawh hi a ni mai thei, dowry phutna a vanga harsatna leh inchhungkhura hmeichhiaten harsatna an tawh chu a reh tak tak thei chuang hauh lo mai a, a zual tulh tulh emaw tih mai tur a ni ta zawk a ni. DVA 2005 hian inchhungkhura hmeichhiaten harsatna an tawhna leh a hremna, dan hmangin mumal zawkin a rawn pholang ta a. Heng thubuai tarlan takah hian thubuai thehluttu chuan thiam a chang a nih chuan Sum leh pai lam a dikna/hamthatna (Financial Rights) mai bakah chenna tur in ngiat theihnan zalenna a pe bawk. Tin, chu mai ni lovin, thubuai neitu chuan thiamloh a chang a nih vaih chuan hremna na tak kum khat chhung tal jail tan leh thiam loh channa lantirnan Rs 20000/- thleng a a chawi thei bawk.


DVA hi India ram chhunga State zawng zawng (Jammu and Kahmir tiamlovin) a hman tura ruahman a ni. Chuti a nih chuan Mizoram pawh kan bang ta bik hauh lo mai le. Han en mai chuan mizo hmeichhiate hi dan hmanga hmuhalh ngai khawp a India ram hmundang hmeichhiate anga dinhmun rapthlak tak chu an nih hmel loh hle. Khawtlang nun han en phei chuan an zellenin mipa tam tak aia thil tithei leh huaisen tak tak lah an tam bawk si. Amaherawhchu heng vang ringawt hian hmeichhiate humhim na dan hi kan mamawh ve lo tihna a ni leh si lova. Tunhnai maiah pawh hmeichhiaten mipa laka kut an tawrh thawm kan hre zut reng mai a. Pawngsual, nupui sawisak leh thah thu te bakah zirna in thenkhata naupang lo khawih mai mai duh thawm te kan hre ta fo mai. NGO thenkhat ten an duhlohthu an chhuah a, thenkhatin an duhloh entirnan kawng an zawh leh ringawt mai a. Mahse heng hian kawngro a su thui meuh lo. Kum 2005 Crime record ah pawh Mizoram chu Hmarchhak State ah chuan hmeichhe laka nunrawnna ah a sang ber dawttu kan ni hial a nih kha. Chuti anih chuan record a awmlo hmeichhe kuttuar tam tak chu an awm ngei ang. Aizawl nula pakhat chuan ti hian a sawi a ‘ Ka pa zu rui hian ka naupan lai atang tawhin min vau nasa in a chang chuan kut te min thlak ringawt thin a. Tun thleng hian ka dik thei tawhlo, hlauthawng reng reng hian ka awm a, ka dawih em em bakah, ka hriselna thleng hian min nghawngin ka hria’ a ti. Tin, nu pakhat vethung chu nu leh pa nei tawh lovin a nutate belin a awm a, a nuta hian a zuruih in nasa takin kut a thlak thin tih a sawi bawk. ‘Tanpui tur duhin ka au ngam ngai lo,ka au chuan nasa zawkin kut min thlak a ni mai.Ngawi rengin ka dawh mai thin. Ka thil tawrh tawh ka thlirlet hian hmeichhiate humhalhna kawng a zirtirna tha kan mamawh ka ti takzet a, a tuartu ni lo tan chuan thil hriatthiam har tak a ni bawk si’ a ti bawk. Kan chhungkuaah chuan a la thleng ve lo a ni maithei mahse, hmeichhe tam tak chuan an tuar tawh a,an tuar mek zel a nih hi.


Thenkhat tan he dan thar hian thu lawmawm tak thlen mahse, India ram hmun hrang hrangah chuan duhlo tak tak an tam ve hle thung. National newspapers leh internet forum thenkhatah te pawh ‘Hmeichhiate chauh em ni inchhungkhura harsatna tawk? Hmeichhiate fuihpawrhna hmanraw tha tak a ni’ tih te in hnialna tha tak tak a tam ve hle thung. Hei hi a dik na chen a awm a, hmeichhe thenkhat pasal te leh chhungte laka harsatna tuar tam tak an awm laiin thenkhat erawh pasal te leh an pasal chhungte mai bakah mahni nutate ngei pawn an ngamloh/kutthlak mai mai pawh hrehlo khawp a hmeichhe kawlh ve tak tak an lo awm ve leh bawk si. Chumai ni lovin sum leh hamthatna dang duh vangte, mimal inhuat avang mai mai a diklo taka lo hman tangkai tum an lo awm ve thei bawk. Mizoramah pawh hmeichhiate dikna leh chanvo humhalh chungchang han sawi chuan tam tak chuan tul kan ti lo hle thin. Amaherawhchu, thenkhat dikloh avanga midang harsatna sutkian na tur kawng lo dan ringawt hi a dik ber em? Tin, heng harsatna te hi kan fanu leh farnu te pawhin an tawrh hun a la awm dawn. Chutih hunah chuan an thlavang hauh a tul lo tiin kan ngawi mai mai dawn em ni ang? June ni 16, 2006 ah Hyderabad-a ‘Role of Women in Nation Building’ tih thupui hmanga workshop buatsaih a nih tumin Bollywood actress Nandita Das chuan ‘kei chu ka dinhmun hi a tha tawk a, ka pasal in min duat mai bakah sum leh paiah harsatna ka nei rih lova,hmeichhe tam tak tawrh ang hi ka la tuar ve ngai lo. Mahse ka hmeichhiatpui hrehawm nasa tak tuar an awm tih ka hriat hian an chanvo humhalh na tur kawng atan a ke pen ve hi ka tihtur niin ka hria, ka kal zel dawn’ tiin a sawi a. Hei hian mahni dinhmun atanga thuthlukna lo siam mai hi a hun tawhlo a ni tih a tilang thei awm e. Engpawhnise, India ram state thenkhata an hmeichhiate tawrh thin ang dowry avanga harsatna rapthlak tak te Mizo hmeichhiaten tuar ve lo mahse DVA hi kan hman ve a tul hun a awm ngei dawn a, kan palzam mai mai thei dawn lo niin alang. Chuti anih chuan hmeichhe thenkhat inchhungkhura harsatna tawk mek te dikna leh chanvo hmuhalh nan te, hetiang thil hluar zel tur dan beh nan leh dik taka hman a nih theih nan zirtirna mumal tak nen he dan hi kan kalpui thiam a tul hle ang.
(Hei hi nikum November thla a ziah a nia…a hlui tawh deuh maithei a ni)